ក្រុងប៉ោយប៉ែត នៅព្រឹកថ្ងៃពុធ ទី២៩ ខែតុលា ឆ្នាំ២០២៥.ឯកឧត្តមបណ្ឌិត ប៉ាន់ ខែមប៊ុនថន អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានដឹកនាំកិច្ចប្រជុំបន្ទាន់មួយ ក្រោមប្រធានបទ ពាក់ព័ន្ធទៅនឹងផ្លូវដែលរងការខូចខាតនៅក្នុងមូលដ្ឋានក្រុងប៉ោយប៉ែត
ដោយសាររថយន្តធំៗដឹកទំនិញលើសទម្ងន់និងរថយន្តដែលដឹកស៊ីម៉ង់លាយស្រេចរបស់ក្រុមហ៊ុនក្រឡុកស៊ីម៉ង់មួយចំនួនដែលកំពុងធ្វើចរាចរណ៍និងបើកអាជីវកម្មយ៉ាងសកម្មនៅក្នុងក្រុងប៉ោយប៉ែត ដោយមានការអញ្ជើញចូលរួមពីសំណាក់ លោ គាត ហ៊ុល អភិបាលក្រុងប៉ោយប៉ែត អភិបាលរងក្រុង មន្ត្រីអនុវត្តការងាររបស់សាលាក្រុង លោក ព្រហ្ម ពិសិដ្ឋ អធិការដ្ឋាននគរបាលក្រុងប៉ោយប៉ែត លោកចៅសង្កាត់ទាំង៥សង្កាត់ ម្ចាស់ក្រុមហ៊ុន តំណាងក្រុមហ៊ុនក្រឡុកស៊ីម៉ង់ តំណាងក្រុមហ៊ុនរថយន្តដឹកទំនិញធំៗ និងតំណាងក្រុមហ៊ុនពាក់ព័ន្ធនានាទៀតដែលមានចំនួនសរុប ១០ ក្រុមហ៊ុន ត្រូវបានទទួលការអញ្ជើញពីសំណាក់ឯកឧត្តមបណ្ឌិត ឲ្យបានចូលរួមក្នុងអង្គពិធីប្រជុំទាំងមូល ដើម្បីឲ្យម្ចាស់ក្រុមហ៊ុននិងតំណាងក្រុមហ៊ុនទាំងអស់ បានធ្វើកិច្ចសន្យាជាមួយនឹងអាជ្ញាធរ ។
លទ្ធផលសម្រេចបាននៅក្នុងអង្គពិធីប្រជុំមានបួនចំណុចសំខាន់ៗគឺ.!
១.ឡានដឹកស៊ីម៉ង់លាយស្រេចដែលត្រូវចុះធ្វើការជ្រេងជើងដើម្បីបាញ់ស៊ីម៉ង់ឲ្យអតិថិជននៅតាមទីសាធារណៈត្រូវជូនដំណឹងដល់អាជ្ញាធរជាមុនដើម្បីឲ្យអាជ្ញាធរបញ្ជូនកម្លាំងក្រុមការងាររៀបចំអនុវត្តទៅលើសណ្ដាប់ធ្នាប់និងចរាចរណ៍.
២.រាល់រថយន្តដឹកទំនិញធំៗត្រូវបញ្ឈប់សកម្មភាពដឹកលើសចំណុះ បើពុំដូច្នោះទេនឹងត្រូវទទួលការផាកពិន័យទៅតាមច្បាប់ដែលបានកំណត់ដាក់ជូន.
៣.គ្រប់ស្ថាប័នក្រុមហ៊ុនពាក់ព័ន្ធទាំងអស់ត្រូវហ៊ានទទួលស្គាល់កំហុសខ្លួនឯងដែលបានធ្វើនិងព្រមជួយចេញសំណងទៅលើផ្លូវដែលបានខូចខាត.
៤.ស្នើដល់ស្ថាប័នក្រុមហ៊ុនពាក់ព័ន្ធនិងបងប្អូនប្រជាពលរដ្ឋរស់នៅក្នុងមូលដ្ឋានជួយថែរក្សាផ្លូវថ្នល់និងហេដ្ឋារចនាសម្ព័ន្ធទាំងអស់ដែលអាជ្ញាធរក៏ដូចជាសប្បុរសជនបានបានស្ថាបនាកសាងរួចហើយដើម្បីទុកប្រើប្រាស់ជាសម្បត្តិសាធារណៈរួមទាំងអស់គ្នា.
ជាចុងបញ្ចប់ឯកឧត្តមបណ្ឌិត ប៉ាន់ ខែមប៊ុនថន អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ លោកបានដាក់បទបញ្ជានៅក្នុងកិច្ចប្រជុំយ៉ាងម៉ឺងម៉ាត់ដល់មន្ត្រីអនុវត្តច្បាប់និងអាជ្ញាធរឱ្យកត់ត្រាទុកនិងអនុវត្តទៅលើវិធានការទាំងអស់ដូចបានរៀបចំនៅក្នុងកិច្ចប្រជុំខាងលើ.៕
