ខេត្តបន្ទាយមានជ័យ៖សម្តេចព្រះឧត្តមចរិយាបណ្ឌិត ឈឹង ប៊ុនឈា ព្រះអនុប្រធាន ថេរៈសភាព្រះពុទ្ធសាសនានៃព្រះរាជាណាចក្រកម្ពុជានៅចុងសប្ដាហ៍នេះ បាននិមន្តជាអធិបតីភាពដ៏ខ្ពង់ខ្ពស់ ក្នុងពិធីចម្រើនព្រះជន្មាយុស្រោចស្រពសុគន្ធវារីប្រគេនព្រះរាជក្រឹត្យនិងប្រកាសតែងតាំង ព្រះសិរីរក្ខិតវង្ស តែម ម៉ាច ជារាជាគណៈថ្នាក់គឺថ្នាក់កិត្តិយសព្រះចៅអធិការ គ្រូសូត្រឆ្វេងឬស្ដាំនៅវត្តរតនារាមផ្សារកណ្តាល ស្ថិតនៅសង្កាត់ផ្សារកណ្ដាល ក្រុងប៉ោយប៉ែតខេត្តបន្ទាយមានជ័យ ។
បន្ទាប់ពីប្រកាស ប្រគល់ប្រគេនព្រះរាជក្រឹត្យប្រកាស សនីយបត្រនិងប្រគល់ត្រាដល់ ព្រះសិរីរក្ខិតវង្ស តែម ម៉ាច ជាព្រះរាជាគណៈថ្នាក់កិត្តិយសព្រះចៅអធិការវត្តនិងប្រគេនប្រកាសតែងតាំងព្រះគ្រូសូត្រស្ដាំគ្រូសូត្រឆ្វេង ព្រមទាំងបានបំពាក់គ្រឿងឥស្សរិយយសរួចមក លោក ង៉ោ ម៉េងជ្រួន អភិបាលរងខេត្ត បានមានប្រសាសន៍ថា ពិធីបុណ្យចម្រើនព្រះជន្ម ស្រោចស្រពសុគន្ធវារីនឹងប្រកាសតែងតាំងគឺជាពិធីបុណ្យ ដែលជាប្រពៃណី ទំនៀមទម្លាប់បង្កប់នូវអត្ថន័យដ៏ល្អផូរផង់មួយដែលពុទ្ធបរិស័ទខ្មែរយេីង បានធ្វើអស់កាលដ៏យូរលង់ណាស់មកហើយ និងមានភ្ជាប់ជាដរាបរហូតមកដល់សម័យយើងនាពេលបច្ចុប្បន្ន។ ប៉ុន្តែប្រពៃណីទំនៀមទម្លាប់នេះ ត្រូវបានបំផ្លាញដោយរបបប្រល័យពូជសាសន៍ ៣ឆ្នាំ ៨ខែនិង ២០ថ្ងៃនៃរបបប៉ុលពត ខឿនវប្បធម៌ជាតិត្រូវបានបំផ្លាញដល់ឬសគល់ ប្រជាជនរស់នៅក្នុងការភ័យខ្លាច និងលួចទន្ទេញបន់ស្រន់ក្នុងចិត្តគ្រប់គ្រប់គ្នា សូមឲ្យទេវតាវត្ថុស័ក្តិសិទ្ធិ គុណបុណ្យបារមីនៃព្រះរតនត្រ័យជួយសង្គ្រោះ ប្រាសចាកក្ដីទុក្ខវេទនានិងមរណៈភ័យនេះ។ រាជរដ្ឋាភិបាលកម្ពុជានីតិកាលទី៧ នៃរដ្ឋសភា ដែលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណជារបៀបវារៈនៃការអភិវឌ្ឍសង្គមសេដ្ឋកិច្ចរបស់កម្ពុជាក្នុងរយៈពេល ២៥ឆ្នាំខាងមុខ គឺកំណើនការងារ សមធម៌ និងប្រសិទ្ធភាព និងចីរភាព កំណត់យកអាទិភាពគន្លឹះ៥ គឺមនុស្ស ផ្លូវ ទឹកភ្លើងនិងបច្ចេកវិទ្យា។ ចុងបញ្ចប់នៃកម្មវិធី លោកជំទាវឧកញ៉ាមហាឧបាសិកា សេង សុខុម ជាម្ចាស់ហាងម្កុដពេជ្រភ្នំពេញ បានផ្តល់អំណោយចែកជូនដល់សិស្សានុសិស្ស និងបងប្អូនប្រជាពលរដ្ឋដែលចូលរួមផងដែរ៕
