ខេត្តបន្ទាយមានជ័យ៖ឯកឧត្តម ម៉ែន សុចិត្រ រដ្ឋលេខាធិការនៃក្រសួងសង្គមកិច្ច អតីតយុទ្ធជននិងយុវនីតិសម្បទា លោក ឈឿន ក្រៃយ៉ុង អភិបាលរងខេត្តបន្ទាយមានជ័យ នាព្រឹកថ្ងៃទី២១ ខែមីនា ឆ្នាំ២០២៤ បានអញ្ជើញជាអធិបតីភាព ក្នុងសិក្ខាសាលាផ្សព្វផ្សាយ ស្តីពីកម្មវិធីស្មុំកូនក្នុងប្រទេស ដល់មន្ត្រីសង្គមកិច្ច បុគ្គលិកសង្គម និងអ្នកពាក់ព័ន្ធ ។ពិធីនេះបានធ្វើឡើងនៅសាលប្រជុំសណ្ឋាគារ ដី វ៉ាយ ជាលេស រីសត ខេត្តបន្ទាយមានជ័យ ដោយមានការចូលរួមពី លោកជំទាវ ធីវ សុខុម ប្រធាន គ.ក.ស.ក ខេត្ត លោក ឃុន វុទ្ធី ប្រធានមន្ទីរសង្គមកិច្ច អតីតយុទ្ធជននិងយុវនីតិសម្បទា និងលោក លោកស្រី មកពីបណ្ដាស្រុកនានាជុំវិញខេត្តផងដែរ។
ឯកឧត្តម ម៉ែន សុចិត្រ រដ្ឋលេខាធិការនៃក្រសួងសង្គមកិច្ច អតីតយុទ្ធជននិងយុវនីតិសម្បទា បានមានប្រសាសន៍ថា រាជរដ្ឋាភិបាលក្រោមការដឹកនាំដ៏ឈ្លាសវៃ និងប៉ិនប្រសប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ប្រជាពលរដ្ឋរស់ដោយគ្មានការភិតភ័យ សុខសុវត្ថិភាព សន្តិភាព និងការអភិវឌ្ឍន៍លើគ្រប់វិស័យ ជាពិសេសវិស័យសង្គមកិច្ច។ ដើម្បីលើកកម្ពស់សិទ្ធិ និងកិច្ចការពារកុមារកម្ពុជាបានផ្តល់ សច្ចាប័នលើអនុសញ្ញារបស់អង្គការសហប្រជាជាតិស្តីពីការការពារកុមារ កាលពីថ្ងៃ១៥ ខែតុលា ឆ្នាំ១៩៩២ និង ពិធីសារពាក់ព័ន្ធ និងបានចូលជាភាគីអនុសញ្ញាក្រុងឡាអេស្តីពីការការពារកុមារ និងសហប្រតិបត្តិការទាក់ទង នឹងស្មុំកូនអន្តរប្រទេស កាលពីថ្ងៃទី១ ខែសីហា ឆ្នាំ២០០៧ ហើយចាប់តាំងពីពេលនោះមក កម្ពុជាបានសហការជាមួយការិយាល័យអចិន្ត្រៃយ៍ នៃអនុសញ្ញាក្រុងឡាអេ ស្តីពីច្បាប់អន្តរជាតិឯកជន ដើម្បីអភិវឌ្ឍន៍ និងកែលម្អគោលនយោបាយច្បាប់ និងនីតិវិធីរបស់កម្ពុជា ដែលទាក់ទងទៅនឹងស្មុំកូនអន្តរប្រទេស ដើម្បីធានាថាគោលនយោបាយច្បាប់ និងនីតិវិធីទាំងនោះមានភាពអនុលោមស្របទៅតាមបទដ្ឋានអន្តរជាតិ។
លោក ឈឿន ក្រៃយ៉ុង អភិបាលរងខេត្ត បានមានប្រសាសន៍ថា កន្លងមកយើងសង្កេតឃើញថា ការអនុវត្តចំពោះការថែទាំកុមារភាគច្រើន គឺធ្វើឡើងក្នុងរូបភាពនៃការថែទាំជំនួសដូចជា ការទុកដាក់កុមារក្នុងគ្រួសារសាច់ញាតិ ថែទាំកុមារជាដើម គ្រួសារធម៌ និងមណ្ឌល ដែលការថែទាំនេះគឺជាដំណោះស្រាយបណ្ដោះអាសន្ន និងគួរតែមានរយៈពេលខ្លីប៉ុណ្ណោះ។ ដោយឡែកការថែទាំកុមារជាអចិន្ត្រៃយ៍ ឬការទុកដាក់កុមារក្នុងផែនការអចិន្ត្រៃយ៍ តាមរយៈស្មុំកូនក្នុងប្រទេសនេះ មិនទាន់បានអនុវត្តបានទូលំទូលាយនៅឡើយ នៅក្នុងខេត្តបន្ទាយមានជ័យយើងនេះ ក៏ដូចជាក្នុងប្រទេសកម្ពុជាយើងទាំងមូល។ ជាទីបញ្ចប់ គណៈអធិបតីក៏បាន ថ្លែងអំណរគុណ ចំពោះក្រុមការងារ គម្រោងកម្មវិធីរបស់អង្គការហូលថ៍អន្តរជាតិ ដែលបានរៀបចំបើក វគ្គបណ្តុះបណ្តាលដ៏មានសារៈសំខាន់ នេះឡើង និងសង្ឃឹមយ៉ាងមុតមាំថា អស់លោកលោកស្រីជា សិក្ខាកាមទាំងអស់ និងខិតខំអស់ពីកម្លាំងកាយចិត្ត ក្នុងការក្រេបជញ្ជក់យកចំណេះដឹង ដ៏មានសារៈសំខាន់ពីគ្រូឧទ្ទេស និង អ្នកសម្របសម្រួលផងដែរ៕
