ខេត្តបន្ទាយមានជ័យ៖ ក្នុងកិច្ចប្រជុំការងារស្រុកម៉ាឡៃ នៃក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យនាថ្ងៃទី២៦ ខែមីនា ឆ្នាំ២០២៤ លោក លោកស្រីដែលជាប្រធានក្រុមប្រឹក្សាឃុំ លោកមេប៉ុស្តិ៍ទាំង៦ ឃុំក្នុងស្រុកម៉ាឡៃ បានមានប្រសាសន៍ប្តេជ្ញាបន្តជំរុញបំពេញការងារ បម្រើលើសេវាសាធារណៈជូនដល់បងប្អូនប្រជាពលរដ្ឋឲ្យទទួលបានភាពលឿនរហ័ស និងមានប្រសិទ្ធភាព ពិសេសតម្រូវការជាចាំបាច់ ។
នាឱកាសនោះលោក ស្វាយ ជា អភិបាលស្រុកម៉ាឡៃ បានបញ្ជាក់ថា ស្រុកម៉ាឡៃ ជាស្រុកមួយ ដែលជាប់ព្រំដែនកម្ពុជា-ថៃមានផ្ទៃដីសរុបចំនួន ៥០០៥៨ហិកតារ មានឃុំចំនួន៦ ភូមិចំនួន៥៤ ក្នុងនោះមាន៥ភូមិនៅក្នុងឃុំតាគង់ ពុំទាន់មានការទទួលស្គាល់ពីក្រសួងមហាផ្ទៃ ពីព្រោះបងប្អូនប្រជាពលរដ្ឋទើបតែរស់នៅថ្មី។
លោក ស្វាយ ជា បានបន្តថា ស្រុកម៉ាឡៃជាតំបន់ដែលមានដីប្រកបដោយជីវជាតិ អំណោយផលសម្រាប់កសិកម្ម ដោយមានប្រជាពលរដ្ឋ៧២ភាគរយជាកសិករនិង២៨ភាគរយគឺជាអាជីវករពាណិជ្ជករនិងកម្មករ។ចំពោះសន្តិសុខសណ្ដាប់ធ្នាប់នៅតាមបណ្ដោយព្រំដែនកម្ពុជា ថៃមានប្រវែង ៤៨គីឡូម៉ែត្រ ភាពស្រស់ស្អាតល្អនេះក៏ដោយសារតែមានកិច្ចសហប្រតិបត្តិការល្អ រវាងអាជ្ញាធរស្រុកម៉ាឡៃ និងអាជ្ញាធរស្រុកអារញ្ញប្រាថេត ខេត្តស្រះកែវ ប្រទេសថៃ ជាពិសេសកិច្ចសហការប្រតិបត្តិរវាងកម្លាំងប្រដាប់អាវុធទាំងពីរប្រទេស។នាឱកាសនោះផងដែរ អស់លោក លោកស្រី ដែលជាមេឃុំ មេប៉ុស្តិ៍បានធ្វើការលើកឡើង ដោយយោងទៅតាម អនុវត្តគោលនយោបាយភូមិឃុំមានសុវត្ថិភាពគឺផ្នែកសន្តិសុខសណ្តាប់ធ្នាប់សាធារណៈបានល្អធ្វើឲ្យបទល្មើសផ្សេងផ្សេង ដូចជាបញ្ហាគ្រឿងញៀនល្បែងស៊ីសង ក្មេងទំនើង ត្រូវបានកាត់បន្ថយ ចំណែកការផ្តល់សេវារដ្ឋបាលនិងសេវាសាធារណៈដោយយោងតាមសេចក្ដីណែនាំរបស់ក្រសួងមហាផ្ទៃលិខិតបទដ្ឋានផ្សេង ៗ តម្លៃសេវារដ្ឋបាលដូចជា ការធ្វើអត្តសញ្ញាណប័ណ្ណ ការចេញសំបុត្រអត្រានុកូលដ្ឋាន លិខិតផ្សេងៗ មួយចំនួនមិនត្រូវបានយកថវិកាពីបងប្អូនប្រជាពលរដ្ឋឡើយ គឺផ្តល់ជូនពួកគាត់ដោយឥតគិតថ្លៃ និងទាន់ពេលវេលាជាការឆ្លើយតបចំពោះបងប្អូនដែលជាមន្ត្រីរាជការ ក្រុមប្រឹក្សាឃុំ ការចូលរួមពីថ្ងៃនេះ។
ឯកឧត្ដម ឌិត ទីណា រដ្ឋមន្ត្រីក្រសួងកសិកម្មនិងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តបន្ទាយមានជ័យ ក៏បានថ្លែងការកោតសរសើរចំពោះអស់លោក លោកស្រី ដែលជាអាជ្ញាធរមូលដ្ឋានដែលបានបំពេញភារៈជាស្នូលបានយ៉ាងល្អហើយសង្ឃឹមថា អស់លោក លោកស្រីនឹងបន្តយកចិត្តទុកដាក់ប្រឹងប្រែងបន្ថែមទៀត។ឯកឧត្តមបានមានប្រសាសន៍បន្តថា យើងត្រូវពិនិត្យកិច្ចការងារស្ថានភាពជាក់ស្តែងទើប ចំពោះបញ្ហាប្រឈមផ្សេងផ្សេងទៅធ្វើផែនការឲ្យបានជាក់លាក់ ត្រូវយល់ដឹងថា ពាក្យថាកង្វះខាតមិនចេះចប់នោះទេដូច្នេះយើងជាអាជ្ញាធរមូលដ្ឋាន កងកម្លាំងមានសមត្ថកិច្ច ត្រូវកំណត់ឲ្យបានច្បាស់លាស់លើសេវាសាធារណៈ សន្តិសុខភូមិ ឃុំមានសុវត្ថិភាពនិងសេវាអប់រំរួមជាមួយនឹងសេវា ផងដែរ៕
