ខេត្តបន្ទាយមានជ័យ៖ពិធីស្រង់ព្រះ ស្រង់ព្រះសង្ស ចាស់ព្រឹទ្ធាចារ្យ គឺជាកិច្ចមួយបញ្ជាក់អំពីទឹកចិត្តប្រកបដោយកតញ្ញូតាធម៌ ដឹងគុណ គោរពគុណបូជាគុណ ដេីម្បីជាសិរីសួស្តីជ័យមង្គលវិបុលសុខកើតមានសម្រាប់ជីវិតមនុស្សគ្រប់ៗរូប ដែលបានប្រតិបត្តិ ។ព្រះអង្គ យឿន សាមឿត ព្រះចៅអធិការវត្តរាជនីវាសនាអារាមព្រះពន្លា ក្នុងសង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ មានសង្ឃដីការបែបនេះក្នុងពិធីត្រាស់ឆ្លងប្រពៃណីឆ្នាំថ្មីនេះ បានបើកសង្ក្រាន្តឆ្នាំរោងឆស័កពុទ្ធសករាជ២៥៦៨ គស ២០២៤ ចាប់ពីថ្ងៃទី១៣ ដល់ថ្ងៃទី២១ ខែមេសា ឆ្នាំ២០២៤ ត្រូវបានបញ្ចប់។ក្នុងពិធីនេះផងដែរ ក៏មានពិធីរាប់បាត្រដល់ព្រះសង្ឃ បញ្ចប់នៃកម្មវិធីបុណ្យចូលឆ្នាំ ពិធីផ្សឹកភ្នំខ្សាច់ ស្រង់ព្រះស្រង់ទឹកព្រះសង្ស ចាស់ព្រឹទ្ធាចារ្យនិងការរាំលេងរបស់បងប្អូនប្រជាពលរដ្ឋយ៉ាងសប្បាយរីករាយ។
ព្រះតេជគុណ យឿន សាមឿត ព្រះអង្គបានមានសង្ឃដីកា ថា កម្មវិធីឆ្លងឆ្នាំ ដើម្បីលាតំណម គឺឈប់តម ហើយមកធ្វើការងារជាធម្មតាវិញ។ក្នុងថ្ងៃត្រាស់ នេះផងដែរ ដើម្បីបញ្ជាក់អំពីអត្ថន័យនៃសាមគ្គីភាព រុងរឿងត្រជាក់ត្រជុំ មនុស្សម្នាទៅមកជួបជុំកុះករប្រកបមុខរបររកស៊ីទទួលទានបានគ្រប់ក្រុមគ្រួសារ។ម្យ៉ាងវិញទៀតដើម្បីបញ្ជាក់អំពីអត្ថន័យបង្ហាញពីរបៀបរស់នៅទំនាក់ទំនងបែបធម្មជាតិ ទឹក ដី ភ្លើង ខ្យល់ ត្រូវអាស្រ័យគ្នាទាំងក្នុងក្រៅ មនុស្សនិងបរិស្ថានពុំអាចខ្វះគ្នាបាននោះឡើយ មនុស្សរស់នៅត្រូវមានទឹកចិត្ត សង្គ្រោះ អនុគ្រោះគ្នាទៅវិញទៅមក ដោយចិត្តមេត្តា មានសីលធម៌ស្មើគ្នាជាកត្តាជំរុញឲ្យមានភ្លៀងធ្លាក់គ្រប់រដូវកាល ដើម្បីឲ្យប្រជាកសិករបង្កបង្កើនផលផ្តល់ផល ឲ្យសង្គមជាតិមាតុភូមិបរិបូរណ៍ដោយសុខសន្តិភាពសុខដុមរមនាជីវភាពធូរធារ គ្រួសារជាសក្ដានុពលសង្គមដ៏រុងរឿង៕
