កិច្ចប្រជុំផ្សព្វផ្សាយសេចក្តីប្រកាសកំណត់តំបន់ធ្វើការវិនិច្ឆ័យ លើការចុះបញ្ជីដីធ្លីមានលក្ខណៈជាប្រព័ន្ធចំនួន១៦ភូមិ ក្នុងស្រុកភ្នំស្រុក

បន្ទាយមានជ័យ ៖ លោក មាស ដារ៉ា ប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដីខេត្តបន្ទាយមានជ័យ នៅថ្ងៃទី១៨ ខែធ្នូ ឆ្នាំ ២០២៤ បានអញ្ជេីញអធិបតីភាព កិច្ចប្រជុំផ្សព្វផ្សាយសេចក្តីប្រកាសកំណត់តំបន់ធ្វើការវិនិច្ឆ័យ លើការចុះបញ្ជីដីធ្លីមានលក្ខណៈជាប្រព័ន្ធចំនួន១៦ភូមិ រួមមាន ភូមិពង្រ ភូមិធ្នង់ខាងជើង ភូមិរង្វាន ភូមិណាំតៅ ភូមិគោកយាង ភូមិគោកចាស់ ភូមិកន្ទួត ភូមិអំពិលកោង ភូមិយាងឧត្តម ភូមិថ្មីខាងត្បូង ភូមិធ្នង់ខាងត្បូង ភូមិសំរោង ភូមិតាគង់ ភូមិស្លែង ភូមិថ្មីខាងជើង និងភូមិច្រាប ស្ថិតនៅក្នុងឃុំណាំតៅ ស្រុកភ្នំស្រុក ខេត្តបន្ទាយមានជ័យ។

ដើម្បីឱ្យការចុះវាស់វែងដំណើរការទៅបានដោយរលូនលោក លោក មាស ដារ៉ា ប្រធានមន្ទីរ ក៏បានធ្វើការសំណូមពរទៅដល់បងប្អូនប្រជាពលរដ្ឋដែលស្ថិតនៅក្នុងតំបន់ដែលត្រូវប្រកាសតំបន់វិនិច្ឆ័យ ត្រូវការរវាស់វែងកំណត់ព្រំដីឱ្យបានច្បាស់លាស់។ ជាពិសេសបើក្នុងករណីមានវិវាទណាមួយកើតឡើង លោកជំរុញដល់បងប្អូនប្រជាពលរដ្ឋធ្វើការដោះស្រាយនិងសម្របសម្រួលគ្នាបានចប់សព្វគ្រប់ ដើម្បីឈានដល់ការចុះវាស់វែងបានលឿន ។ បើក្នុងករណីការដោះស្រាយវិវាទព្រំដីធ្លីមិនចប់ ក្រុមការងារមិនធ្វើការចុះវាស់វែងនៅឡើយ។ ជាមួយគ្នានោះដែរលោកប្រធានមន្ទីរ ក៏បានធ្វើការពន្យល់ណែនាំដល់បងប្អូនប្រជាពលរដ្ឋ ត្រូវត្រៀមឯកសារចាំបាច់មួយចំនួន ដើម្បីធ្វើការចុះបញ្ជីដីធ្លីមានលក្ខណៈជាប្រព័ន្ធ ។

សូមបញ្ជាក់ផងដែរថា នីតិវិធីនៃការចុះបញ្ជីដីធ្លីមានលក្ខណៈជាប្រព័ន្ធមាន ៥ ដំណាក់កាល ១. ត្រៀមរៀបចំ គឺជាការកំណត់តំបន់ធ្វើការវិនិច្ឆ័យ ការបង្កើតគណៈកម្មការរដ្ឋបាល ការជូនដំណឹង កិច្ចប្រជុំផ្សព្វផ្សាយ និងដំណើរការផ្សព្វផ្សាយអំពីការចុះបញ្ជីដីធ្លីមានលក្ខណៈជាប្រព័ន្ធ, ២. ប្រតិបត្តិការបច្ចេកទេស គឺជាការចុះកំណត់ព្រំ វាស់វែង និងវិនិច្ឆ័យ ដើម្បីកសាងប្លង់សុរិយោដី និងបញ្ជីឈ្មោះម្ចាស់ដី, ៣. បិទផ្សាយជាសាធារណៈនូវឯកសារនៃការវិនិច្ឆ័យ មានប្លង់សុរិយោដី និងបញ្ជីឈ្មោះម្ចាស់ដី រយៈពេល ១៥ថ្ងៃ ដើម្បីឱ្យម្ចាស់ដី និងអ្នកដែលពាក់ព័ន្ធធ្វើការផ្ទៀងផ្ទាត់ឈ្មោះ ស្ថានភាពគ្រួសារ និងក្បាលដីរបស់ខ្លួន ព្រមទាំងធ្វើការតវ៉ាក្នុងករណីមានការខុសឆ្គង, ៤. សម្រេចលើឯកសារវិនិច្ឆ័យ របាយការណ៍ពីលទ្ធផលនៃការបិទផ្សាយជាសាធារណៈនូវឯកសារ នៃការវិនិច្ឆ័យរបស់គណៈកម្មការរដ្ឋបាល ធ្វើការបូកសរុប និងធ្វើសំណើជូន ឯកឧត្តម អភិបាលខេត្ត ដើម្បីពិនិត្យ និងបញ្ជូនបន្តទៅក្រសួងរៀបចំដែនដី នគរូបនីយកម្ម និងសំណង់ ដើម្បីពិនិត្យ និងសម្រេចជូនអ្នកកាន់កាប់ណាដែលបានបំពេញគ្រប់លក្ខខណ្ឌតាមច្បាប់កំណត់ និងពុំមានទំនាស់, ៥. ចេញបណ្ណនិងចែកបណ្ណជូនម្ចាស់ដី៕